1256    

08/01/2017

1607-ci ildə - Səfəvilərlə Osmanlı arasında növbəti müharibə (1603-1612) gedişində türk qoşunlarının əlində olan Bakıda xalq üsyanı başlayıb. Səfəvi qoşunları şəhərə daxil olaraq Osmanlı qüvvələrini oradan vurub çıxarıblar. Bakı, Azərbaycan digər əraziləri ilə bərabər, tərəflər arasında bundan öncəki (1578-1590) müharibədə Osmanlının nəzarətinə keçmişdi. Səfəvi dövləti Bakını geri almaqla müharibənin gedişini tamamilə öz xeyrinə dəyişməyə müvəffəq oldu.

1857-ci ildə - Azərbaycan sərkərdəsi, general Əmənulla mirzə Qovanlı-Qacar Şuşada doğulub (1857-1937). 

1919-cu ildə - Azərbaycan parlamentinin 1919-cu il yanvarın 8-i olan iclasda Naxçıvan bölgəsi və ümumiyyətlə, keçmiş İrəvan quberniyasının azərbaycanlı əhalisinin vəziyyəti ilə bağlı məsələlər müzakirə edildi. 

1920-ci ildə - Azərbaycanın xalq artisti, teatr və kinoda bir çox yaddaqalan obrazlar yaratmış görkəmli sənətkar Leyla Ağalar qızı Bədirbəyli (1920-2000) Bakı şəhərində anadan olmuşdur.

1992-ci ildə - Erməni təxribatçı dəstələri Azərbaycana qarşı daha bir terror əməli həyata keçiriblər. Türkmənistandan Krasnovodsk (Türkmənbaşı)-Bakı marşrutu ilə hərəkət edən dəniz bərəsində törədilən terror aktı nəticəsində 25 nəfər həlak olub, 88 nəfər yaralanıb.

1995-ci ildə - Azərbaycan Qayana Respublikası ilə diplomatik münasibətlər qurub.   

1998-ci ildə - Azərbaycanlı tarixçi, alim, akademik, tarix elmləri doktoru, kino məsləhətçisi və Azərbaycan Tarix Muzeyinin keçmiş direktoru Püstəxanım Əzizağa qızı Əzizbəyova (1929-1998) vəfat edib.