1258    

04/02/2017

1918-ci ildə - Böyük bəstəkar, SSRİ xalq artisti Qara Əbülfəz oğlu Qarayev (1918-1982) anadan olub. Dünya müsiqi xəzinəsinə daxil olan "Yeddi gözəl", "İldırımlı yollarla" baletlərini yazıb.

1925-ci ildə - Azərbaycan Xalq Komissarları Soveti Bakıda Kitab Palatası təşkil etmək bərədə qərar verib. 

1927-ci ildə - Azərbaycan Kommunist (bolşevik) Partiyasının Mərkəzi Komitəsinin katibliyi ayrı-ayrı yazıçı təşkilatlarının üç bölməsi (Azərbaycan, rus və erməni) və birləşmiş idarə heyəti olan vahid Azərbaycan Proletar Yazıçıları Assosiasiyasında (APYA) birləşdirməyi qərara aldı. "Qızıl qələmlər" cəmiyyəti APYA-nın Azərbaycan bölməsinə, Bakı Proletar Yazıçılarının Assosiasiyası isə rus bölməsinə çevrildi. 

1929-cu ildə - Görkəmli xanəndə, bəstəkar, xalq artisti Əlibaba Balaəhməd oğlu Məmmədov Bakı şəhərində anadan olub. 

1934-cü ildə - Musiqişünas, əməkdar incəsənət xadimi, professor Aida Zeynal qızı Tağızadə Şuşa şəhərində anadan olmuşdur.

1939-cu ildə - Azərbaycanlı yazıçı, nasir, dramaturq, ssenarist, prodüser, kinorejissor, Azərbaycanın əməkdar incəsənət xadimi Rüstəm Məmmədibrahim oğlu İbrahimbəyov Bakıda anadan olub. 

1940-cı ildə - Fizika-riyaziyyat elmləri doktoru Fuad Qasım oğlu Qasımov (1940-2009) Bakıda anadan olub. 

1963-cü ildə - Azərbaycanlı aktrisa Münəvvər Səməd qızı Kələntərli (1912-1963) vəfat edib. 

1991-ci ildə - 12-ci çağırış Ali Sovetin ilk iclasında Azərbaycan SSR-in Azərbaycan Respublikası adlandırılması haqqında qərar qəbul olunub, Xalq Cümhuriyyətinin üçrəngli bayrağı Azərbaycanın Dövlət bayrağı kimi təsdiq edilib. Bundan öncə, 1990-cı ilin noyabrında Azərbaycanın bayrağı Naxçıvan Ali Məclisində qəbul olunmuşdu. Dövlət bayrağı bərabər enli üç üfüqi (mavi, qırmızı, yaşıl) zolaqdan ibarətdir. Mavi rəng - Azərbaycan xalqının türk mənşəli olmasını, qırmızı rəng - müasir cəmiyyət qurmaq istəyini, yaşıl rəng - İslam dininə mənsubluğunu ifadə edir. Qırmızı zolağın ortasında ağ rəngli aypara ilə səkkizguşəli ulduz təsvir edilib.

1993-cü ildə - Fevralın 4-dən 5-nə keçən gecə erməni hərbi birləşmələri hücuma keçərək Çıldıran, Dəvədaşı, Qozlu və Qızılqaya kəndlərini işğal etdilər. 

2008-ci ildə - ANS Şirkətlər Qrupu və Çingiz Mustafayev adına Fondun 2007-ci il üzrə "İlin adamı" mükafatı prezident İlham Əliyevə təqdim edilib. İlham Əliyev bu mükafata 2007-ci ildə Bakı-Tbilisi-Qars dəmiryolu xəttinin təməlinin qoyulması, Azərbaycan qazının Avropa bazarına çıxması, ölkədə infrastruktur layihələrinin həyata keçirilməsi, məcburi köçkünlərin çadır düşərgələrinin ləğv olunması, ordu quruculuğu və mətbuatın inkişafına verdiyi töhfələrə görə layiq görülmüşdü.