"15 DEKABR" TARIXIMIZDƏ
Ana səhifə > Xəbərlər > "15 Dekabr" tariximizdə
1017    
14/12/2017

1815-ci ildə - Çar Rusiyası ordusunda xidmət etmiş türk əsilli ilk yüksəkrütbəli hərbçi, general-leytenant İsrafil Ağa Yadigarov (1815-1884) Borçalı qəzasının Qaçağan kəndində Qarapapaq tayfasından olan Yadigarlı ailəsində dünyaya gəlib.

1907-ci ildə - Görkəmli torpaqşünas alim, ictimai-siyasi xadim, kənd təsərrüfatı elmləri doktoru, Azərbaycan SSR Elmlər Akademiyasının akademiki, əməkdar elm xadimi, Dövlət mükafatı laureatı Həsən Əlirza oğlu Əliyev (1907-1993) Zəngəzur qəzasının Comərdli kəndində anadan olmuşdur.

1908-ci ildə - Tarix elmləri doktoru, professor, Azərbaycan SSR əməkdar elm xadimi Nəzər Abdulla oğlu Paşayev İrəvan quberniyasının Böyük Vedi kəndində doğulmuşdur.

1909-cu ildə - Azərbaycanın əməkdar incəsənət xadimi, xalq rəssamı, Dövlət mükafatı laureatı Səttar Bəhlul oğlu Bəhlulzadə (1909-1974) Bakının Əmircan kəndində anadan olmuşdur.

1910-cu ildə - Tanınmış geoloq, akademik Şəfayət Fərhad oğlu Mehdiyev (1910 - 1993) İranın Sərab vilayətinin Şalqun kəndində anadan olub.

1913-cü ildə -  “Şöhrət” ordeni ilə təltif edilmiş tarix elmləri doktoru, ictimai xadim, Azərbaycan Respublikası Prezidentinin fərdi təqaüdçüsü Kamran Əsəd bəy oğlu Hüseynov (1913-2006) Zəngəzur qəzasının Çərəli kəndində anadan olmuşdur.

1918-ci ildə - Təyyarəçi, tarix elmləri doktoru, professor, "Şöhrət" ordeni laureatı Məzahir Həmid oğlu Abasov (1918-2002) Bakının Maştağa kəndində anadan olmuşdur.

1946-cı ildə - Şair, yazıçı, esseist, kinossenarist, tərcüməçi, Azərbaycan Yazıçılar Birliyinin üzvü Ramiz Məmmədəli oğlu Əliyev (Ramiz Rövşən) Bakının Əmircan kəndində anadan olmuşdur.

1988-ci ildə - Yazıçı, satirik şair, ssenarist Rüfət Zülfüqar oğlu Əhmədzadə (1933-1988) Bakıda vəfat etmişdir. 

1994-cü ildə - Prezident Heydər Əliyev İslam Konfransı Təşkilatının Kasablankada (Mərakeş) keçirilən zirvə toplantısında çıxış edərək müsəlman ölkələrini Ermənistanın Azərbaycana hərbi təcavüzünə qarşı daha təsirli mövqe tutmağa çağırıb. Sammitin yekun sənədləri sırasında Ermənistanın Azərbaycana təcavüzünü pisləyən qətnamə qəbul edilib.

2001-ci ildə - ABŞ-ın müdafiə naziri Donald Ramsfeld Cənubi Qafqaza səfəri çərçivəsində Bakıya gəlib. Bu, Pentaqonun şefinin regiona ilk səfəri idi. Ramsfeld Azərbaycanın beynəlxalq antiterror kampaniyasında fəal iştirakına görə ölkə rəhbərliyinə təşəkkür edib, prezident Heydər Əliyevlə ABŞ-Azərbaycan hərbi əməkdaşlığını müzakirə edib.

2003-cü ildə - Azərbaycan xalqı Heydər Əliyevlə vidalaşıb. Dəfn mərasimində Türkiyə, Rusiya, Qazaxıstan, Ukrayna prezidentləri, Gürcüstanın dövlət rəhbərliyi, digər ölkələrdən yüksək nümayəndə heyətləri iştirak edib. Böyük öndər Fəxri Xiyabanda dəfn olunub.