"13 DEKABR" TARIXIMIZDƏ
Ana səhifə > Xəbərlər > "13 Dekabr" tariximizdə
1056    
13/12/2017

1917-ci ildə - Bakı fəhlə və əsgər deputatları Sovetinə ikinci seçkilər keçirilib. Oktyabrın 22-də keçirilmiş ilk seçkilərdə məğlub olan bolşeviklər nəticələri tanımayaraq Bakı Soveti hökumətini - İcraiyyə Komitəsini zorla ələ keçirmişdilər. İkinci seçkini özlərinin tərtib etdikləri sistem üzrə keçirən bolşeviklər bu dəfə istədiklərini əldə etdilər. Şaumyanın rəhbərlik etdiyi bolşeviklər Bakı Sovetində 51 yer, daşnaklar 41 yer, sol eserlər 38, sağ eserlər 28 yer qazanmışdı. İlk seçkilərin qalibi (40 faiz) olmuş "Müsavat" 21 yerlə kifayətlənməli olmuşdu. Yeni İcraiyyə Komitəsində 18 yerdən 11-nə sahib olan bolşeviklər (6) və daşnaklar (5) Bakıda faktiki hakimiyyəti ələ aldılar.

1929-cu ildə - Şərqşünas alim, tarix elmləri doktoru, professor Saleh Məmməd oğlu Əliyev (1929-2006) Gəncə şəhərində anadan olmuşdur.

1991-ci ildə - Pakistan İslam Respublikası Azərbaycanın dövlət müstəqilliyini tanıyıb. Bu, Azərbaycanın müstəqilliyini tanıyan üçüncü (Türkiyə və Rumıniyadan sonra) dövlət idi. İki ölkə arasında diplomatik əlaqələr 1992-ci il iyunun 9-da quruldu.

1994-cü ildə - Azərbaycan Kolumbiya ilə diplomatik münasibətlər qurub.

2001-ci ildə - “Şöhrət” ordeninə layiq görülmüş Xalq rəssamı, Əməkdar rəssam Vidadi Yaqub-Fərman oğlu Nərimanbəyov (1926-2001) vəfat edib. 2006-cı ildə Vidadi Nərimanbəyovun xatirəsinə “Sənətə həsr olunmuş ömür” filmi lentə alınmışdır.

2002-ci ildə - Etnoqraf, tarix elmləri doktoru, professor Qiyasəddin Əsgər oğlu Qeybullayev (1934-2002) vəfat edib. 

2007-ci ildə - Prezident İlham Əliyev Azərbaycan Respublikasının Prezidenti yanında Qeyri-hökumət Təşkilatlarına Dövlət Dəstəyi Şurası yaradılması haqqında fərman imzalayıb və Şuranın Əsasnaməsini təsdiq edib. Əsasnaməyə görə, Şuranın 11 üzvündən 3-ü dövlət orqanları nümayəndələrindən, 8-i qeyri-hökumət təşkilatlarının irəli sürdüyü namizədlərdən təşkil olunmalı idi. Prezident 2008-ci il aprelin 16-da Şuranın üzvlərinin təyin edilməsi haqqında sərəncam imzaladı və qurum fəaliyyətə başladı.