1005    

03/12/2017

1905-ci ildə - Konstitusion Demokratlar Partiyasının Bakı şöbəsinin təşkilində iştirak edən Azərbaycan cəmiyyətinin nümayəndələrindən İ.Hacınski, İ.Hacıyev, Ə.Topçubaşov, K.Səfərəliyev şöbənin daimi bürosuna seçildilər. Şöbənin 300 nəfər üzvü var idi. 

1929-cu ildə - Zaqatala qoruğu yaradılıb. Zaqatala və Balakən rayonları ərazisində 25 min hektardan çox ərazini əhatə edən qoruqda adı "Qırmızı kitaba" düşmüş onlarla nadir bitki və heyvan növü mühafizə olunur.

1950-ci ildə - Azərbaycan Dillər Universitetinin rektoru, Azərbaycan Respublikasının millətlərarası, multikulturalizm və dini məsələlər üzrə Dövlət müşaviri (2014-2017), filologiya elmləri doktoru, professor, əməkdar elm xadimi, AMEA-nın həqiqi üzvü, Azərbaycan Yaradıcılıq Fondunun sədri, Bakı Slavyan Universitetinin sabiq rektoru (2000-2014), Azərbaycan Respublikasının Prezidenti yanında Bilik Fondunun Himayəçilik Şurasının üzvü (18 iyul 2014-cü ildən), Bakı Beynəlxalq Multikulturalizm Mərkəzi Himayəçilik Şurasının sədri Kamal Mehdi oğlu Abdullayev Bakı şəhərində anadan olub. 

1988-ci ildə - Bakının Lenin (indiki Azadlıq) meydanında noyabrın 17-dən davam edən mitinqlərə ordu hissələrinin müdaxiləsi ilə son qoyulub. 18 gün davam edən aksiya Ermənistandan azərbaycanlıların kütləvi deporatsiyasına, Ermənistanın Azərbaycana qarşı ərazi iddialarına SSRİ-nin və o vaxtkı respublika rəhbərliyinin bəslədiyi laqeyd münasibətə kütləvi xalq etirazı idi. Dekabrın 4-də Bakıda fövqəladə vəziyyət rejimi tətbiq edilmiş, gecə yarısı meydana SSRİ DİN-in Daxili Qoşunları və hərbi texnika yeridilmiş, aksiya böyük zorakılıqla dağıdılmışdı. Yüzlərlə insan həbs olunmuş və yaralanmışdı.

1989-cu ildə - "Azadlıq" qəzetinin kütləvi tirajla nəşrinə başlandı. 

1994-cü ildə - "Azərbaycana xidmət" vəqfi tərkibində "Azərbaycan Strateji Araşdırmalar Mərkəzi" adlı təşkilat yaradılmışdı.

1999-cu ildə - Prezident Heydər Əliyev amnistiya haqqında fərman imzalayıb. Avropa Şurasının 50 illiyi münasibətilə elan edilən amnistiya aktı 11 min məhbusa şamil edildi, 4 min nəfər cəzaçəkmə yerlərindən azadlığa çıxdı.

2008-ci ildə - ATƏT-in Xarici İşlər Nazirləri Şurasının Helsinkidə keçirilən illik toplantısında Azərbaycan nümayəndə heyəti "Dağlıq Qarabağ münaqişəsinin sülh yolu ilə nizamlanmasına dair prinsiplər" adlı sənəd yayıb. Sənəddə Azərbaycanın münaqişənin siyasi vasitələrlə həllinə tərəfdar olduğu, lakin heç vaxt ərazi bütövlüyünü güzəştə getməyəcəyi vurğulanırdı. Helsinkidə Azərbaycan və Ermənistan XİN rəhbərlərinin Rusiya və Fransa xarici işlər nazirləri və ABŞ dövlət katibi yardımçısının iştirakı ilə görüşü keçirilib.  

2010-cu ildə - Tanınmış bioloq alim, bacarıqlı elm təşkilatçısı, akademik Musa Əbdürrəhman oğlu Musayev (1921-2010) vəfat etmişdir.