981    

17/11/2017

1883-ci ildə - Görkəmli cərrah, Azərbaycan SSR EA-nın ilk prezidenti (1945-1947), Azərbaycanın ilk tibb elmləri doktoru (1927), professor (1929), Azərbaycan SSR EA-nın həqiqi üzvü (1945), Azərbaycan SSR əməkdar elm xadimi (1934), SSRİ Ali Sovetinin (1-3-cü çağırış) deputatı Mirəsədulla Mir Ələsgər oğlu Mirqasımov (1883-1958) anadan olub.

1906-cı ildə - Azərbaycan xalça sənətinin yorulmaz təbliğatçısı, xalq rəssamı, naxışşünas və xalçaşünas Lətif Hüseyn oğlu Kərimov (1906-1991) Şuşa şəhərində anadan olmuşdur.  

1914-cü ildə - Məhəmmədəli şah diktaturasına qarşı Məşrutə inqilabının (1905-1911) görkəmli xadimi, xalq qəhrəmanı Səttar xan (1866-1914) vəfat edib və Tehranın Şah Əbdüləzim qəbiristanlığında dəfn olunur. 

1918-ci ildə - General V.Tomsonun başçılıq etdiyi ingilis qoşunları Bakıya daxil olub. I Dünya müharibəsində məğlub olmuş Osmanlı ilə qalib Antanta dövlətləri (ABŞ, Britaniya, Fransa, İtaliya) arasında imzalanan Mudros sazişinə görə, Bakı və Batum şəhərləri, Cənubi Qafqazın dəmir yolu şəbəkəsi ingilislərin nəzarətinə verilmişdi. Bakıya 5 min ingilis hərbçisi gəlmişdi. İngilis hərbi kontingenti 1919-cu ilin avqustunadək Bakıda qaldı.

1919-cu ildə - Azərbaycan Xalq Cümhuriyyətinin Nazirlər Şurasının iclasında maarif nazirinin türk opera-dram teatrının təşkili haqqında məruzəsi dinlənilərək, Dövlət Türk-Opera-Dram Teatrının təşkil olunmasını nəzərdə tutan qanun layihəsini bəyənildi. 

1963-cü ildə - Azərbaycanın Milli Qəhrəmanı Sergey Murtuzəli oğlu Murtuzəliyev (1963-1993) Bakının Pirallahı qəsəbəsində anadan olmuşdur.

1988-ci ildə - Bakıdakı Lenin (indiki Azadlıq) meydanında ermənilərin Qarabağ iddialarına və azərbaycanlı əhalinin Ermənistandan deportasiyasına etiraz olaraq fasiləsiz mitinqlər başlayıb. Dekabrın 4-dək davam edən mitinqlərə 1 milyonadək insan toplaşırdı. Bu, SSRİ-də ən böyük kütləvi çıxışlar idi və Azərbaycan tarixinə milli dirçəliş aksiyaları kimi düşdü. İlk dəfə həmin mitinqlərdə Azərbaycanın üçrəngli bayrağı qaldırılmışdı. 1992-ci ildə 17 noyabr Milli dirçəliş günü elan edildi.

1990-ci ildə - Naxçıvan MSSR Ali Məclisinin yeni seçilmiş tərkibdə ilk iclası keçirilib. Məclisin qocaman deputatı olan Heydər Əliyevin sədrliyi ilə keçən iclasda tarixi qərarlar qəbul edilib: Ali Məclisdə ilk dəfə Xalq Cümhuriyyətinin üçrəngli bayrağı qaldırılıb, muxtar respublikanın adından "Sovet Sosialist" sözləri çıxarılıb.

2006-ci ildə - Prezident İlham Əliyev türkdilli dövlət başçılarının Antalyada keçirilən 8-ci sammitində iştirak edib.

2007-ci ildə - Bakıda türk dövlət və toplumlarının XI dostluq, qardaşlıq və əməkdaşlıq qurultayı keçirilib.