"VIKIPEDIYADA MÖVZULU AY VƏ MÜKAFATLANDIRMA" MÖVZUSUNDA TƏDBIR KEÇIRILIB
Ana səhifə > Xəbərlər > "Vikipediyada mövzulu ay və mükafatlandırma" mövzusunda tədbir keçirilib
1069    
14/11/2017

Bu gün Azərbaycan Milli Elmlər Akademiyasının Mərkəzi Elmi Kitabxanasının təşkilatçılığı ilə Vikipediya ilə bağlı tədbir keçirilib. 

"Vikipediyada mövzulu ay və mükafatlandırma" adlanan tədbir AMEA-nın Coğrafiya İnstitutunun təşəbbüsü ilə keçirilmiş Vikipediyanın "Mövzulu ay" layihəsi üzrə "Coğrafiya ayı"nın yekun nəticələrinə və bu layihədə iştirak edərək yer tutan təlim iştirakçılarının mükafatlandırılmasına həsr olunmuşdu.  

Qeyd edək ki, 2016-cı ilin fevral ayından etibarən AMEA Mərkəzi Elmi Kitabxanasının Sərbəst Elektron Resuslarla İş Şöbəsinin Təlimlər üzrə Sektor rəhbəri Günay xanım Məmmədova tərəfindən Vikipediya üzrə təlim keçirilir. İndiyə qədər keçirilən təlimlərdə AMEA-nın İnstitut və Təşkilatlarının, o cümlədən də digər dövlət təşkilatlarının əməkdaşları və tələbələr iştirak edib.   

Bu təlimlərdə iştirak edib Azərbaycan türkcəsində olan Vikipediyanın zənginləşməsinə keyfiyyətli və faydalı məqalələri ilə töhfə verməyə çalışan təlim iştirakçılarının AMEA Mərkəzi Elmi Kitabxanasının rəhbərliyi tərəfindən diqqətdə saxlanılması təqdirəlayiq haldır. Tədbirin gedişində Vikipediyanın "Mövzulu ay" layihəsində iştirak edərək yer tutan təlim iştirakçıları sertifikat, təşəkkürnamə və müxtəlif kitab hədiyyələri ilə mükafatlandırılıb.

Tədbirin təşkilinə, göstərilən diqqət və qayğıya görə Mərkəzi Elmi Kitabxanasının direktoru Leyla xanım İmanovanın simasında təşkilatın idarə heyətinə "Azərbaycan Tarixi Elektron Kitabxanası" adından təşəkkürümüzü bildiririk.