"31 OKTYABR" TARIXIMIZDƏ
Ana səhifə > Xəbərlər > "31 Oktyabr" tariximizdə
894    
31/10/2017

1898-ci ildə - Azərbaycanın “İgid nişanı” ordeni, Polşanın 4 ordeni ilə təltif edilmiş Polşa və Qafqaz mühacirləri cəmiyyətlərinin fəal üzvü polkovnik Vəli bəy Sadıq bəy oğlu Yadigarov (1898-1971) Borçalının Təkəli kəndində zadəgan ailəsində anadan olmuşdur.

1914-cü ildə - Çar Rusiyası rəsmi surətdə Osmanlı imperiyasına qarşı müharibə elan etdi. Buna səbəb türk və alman gəmilərinin Sevastopol, Odessa, Novorossiysk və Feodosiyanı atəşə tutması, alman "Breslau" kreyserinin Kerç boğazından çıxış yolunu minalaması oldu.

1943-cü ildə - "İranın SSRİ ilə Mədəni Əlaqələr Cəmiyyəti" fəaliyyətə başladı. Cəmiyyətin İranın 34 şəhərində açılmış şöbələri içərisində ən fəalı 1944-cü il avqustun 12-də yaradılmış Təbriz şöbəsi idi. 

1953-cü ildə - Azərbaycanın Milli Qəhrəmanı Koroğlu İsmayıl oğlu Rəhimov (1953-1992) Oğuz rayonunda anadan olmuşdur.

1955-ci ildə - Kino bəstəkarı, əməkdar incəsənət xadimi, A.Şaiq adına Azərbaycan Dövlət Kukla teatrının musiqi hissə müdiri Cahangir Oqtay oğlu Zülfüqarov Bakı şəhərində anadan olub.

1962-ci ildə - Tarix üzrə fəlsəfə doktoru, A.A.Bakıxanov adına Tarix İnstitutunun əməkdaşı, ömrünü Azərbaycanın Şimal-Qərb bölgəsinin tarixinin tədqiqi və təbliğinə həsr edən Akif Əlavəddin oğlu Məmmədli Balakən rayonunda anadan olub. 

1990-cı ildə - Coğrafiya elmləri namizədi, fəaliyyətini əsasən Azərbaycanın toponomikasının tədqiqinə həsr edən alim Rəmzi Möhsün oğlu Yüzbaşov (1906-1990) avtomobil qəzası nəticəsində dünyasını dəyişmişdir. 

1992-ci ildə - Ankarada türkdilli dövlət başçılarının birinci zirvə toplantısı (29-31 oktyabr) yekunlaşıb. Türkiyə prezidenti Turqut Özalın təşəbbüsü ilə keçirilən sammitdə Azərbaycan, Türkmənistan, Qazaxıstan, Qırğızıstan və Özbəkistanın dövlət başçıları iştirak edirdi. Bu toplantı ilə türkdilli dövlət başçılarının zirvə görüşlərinin əsası qoyulub, növbəti sammitlər 1994 (İstanbul), 1995 (Bişkək), 1996 (Daşkənd), 1998 (Astana), 2000 (Bakı), 2001 (İstanbul) və 2006-cı (Antalya) illərdə keçirilib.

2003-cü ildə - Azərbaycan Respublikasının prezidenti İlham Əliyevin rəsmi inauqurasiya (andiçmə) mərasimi keçirilib. Mərasimdə Gürcüstan rəhbəri Eduard Şevardnadze, Rusiyanın Federasiya Şurasının sədri Sergey Mironov, Ukraynanın baş naziri Viktor Yanukoviç, Türkiyə baş nazirinin müavini Əbdüllətif Şener, İranın vitse-prezidenti Məhəmmədəli Əbtəhi, xarici diplomatik korpusun və beynəlxalq təşkilatların təmsilçiləri iştirak ediblər.

2007-ci ildə - Azərbaycan Milli Elmlər Akademiyasının həqiqi üzvü, tarix elmləri doktoru, professor, Əməkdar elm xadimi, bir neçə dəfə Azərbaycan Respublikası Ali Sovetinin deputatı seçilmiş və 1992-ci ildən Azərbaycan Respublikası Milli Şurasının üzvü olmuş Tofiq Qasım oğlu Köçərli (1929-2007) vəfat etmişdir.

2008-ci ildə - Prezident İlham Əliyevin ikinci səlahiyyət müddətinə başlamasından (24 oktyabr) sonra Konstitusiyanın tələbinə müvafiq olaraq istefa vermiş Nazirlər Kabinetinin yeni tərkibi elan olunub. Prezidentin sərəncamına əsasən, iqtisadi inkişaf naziri (Heydər Babayev) istisna olmaqla hökumətin bütün üzvləri əvvəlki vəzifələrinə təyin ediliblər. Bundan öncə (29 oktyabr) prezident Artur Rasizadənin yenidən baş nazir təyin olunması haqqında sərəncam imzalamışdı.