919
29/10/2017 1907-ci ildə - Tanınmış jurnalist, tərcüməçi və naşir Adil Əfəndiyev (1907-1973) Gürcüstanın Axalsix rayonunda anadan olub. "Azərnəşr"in direktoru, Dövlət Mətbuat Komitəsi sədrinin müavini işləyib. Azərbaycan Jurnalistlər Birliyinin ilk sədri olub. Rusca-azərbaycanca 4-cildlik lüğətin tərtibçisi və redaktorudur, rus və Avropa yazıçılarının əsərlərini dilimizə çevirib.
1918-ci ildə - I Dünya müharibəsində məğlub duruma düşən Osmanlı dövləti Antanta ölkələri ilə Mudros sülh sazişi imzalayaraq qoşunlarını Azərbaycandan və bütün Cənubi Qafqazdan çıxarmaq barədə öhdəlik götürüb. Mudros sazişinə əsasən, Bakını tərk edəcək Osmanlı qoşunlarının yerinə şəhərə ingilis qüvvələri daxil olmalı idi. Bu məqam Azərbaycanla razılaşdırılmadığı üçün Xalq Cümhuriyyətinin hökuməti Osmanlı hökumətinə etirazını bildirib. Lakin bunun elə bir nəticəsi olmayıb.
1919-cu ildə - Azərbaycan Xalq Cümhuriyyətinin parlamenti tərəfindən "Mətbuat haqqında Nizamnamə" qəbul edildi.
1922-ci ildə - Dağlıq Qarabağın vəziyyəti haqqında müxtəlif məsələlərin dəfələrlə müzakirəsindən sonra, Azərbaycan K(b)P MK-nın Rəyasət Heyəti Qarabağın muxtariyyəti haqqında məsələnin işlənib hazırlanması üzrə komissiyanın S.A.Ağamalıoğlunun sədrliyi ilə tərkibini təsdiq etdi.
1928-ci ildə - Görkəmli sənətşünas alim, AMEA-nın Memarlıq və İncəsənət İnstitutunun direktoru, akademik Rasim Səməd oğlu Əfəndiyev (1928-2010) Qazax rayonunda anadan olmuşdur. 200-dən artıq elmi məqalə və 30 kitab müəllifi olan R.Əfəndiyev milli sənətşünaslıq tarixi məktəbinin banilərindən biridir. "Azərbaycan dekorativ-tətbiqi sənəti", "Azərbaycanın bəzək sənəti", "Azərbaycan daş plastikası" kitabları xarici dillərə tərcümə olunub.
1991-ci ildə - oktyabrın 30-dan etibarən Xocalı şəhərinə aparan bütün avtomobil yolları bağlanmış, yeganə nəqliyyat vasitəsi vertolyot qalmışdı.
1992-ci ildə - Görkəmli şair, Azərbaycan SSR-nin Əməkdar incəsənət xadimi, Azərbaycan SSR-nin Ali Soveti Rəyasət Heyətinin Fəxri fərmanı ilə təltif edilmiş Tofiq Mütəllim oğlu Mütəllibov (1929-1992) vəfat etmişdir.