1065    

24/03/2017

1910-cu ildə - Tanınmış aktyor, xalq artisti Ələsgər Hacıağa oğlu Ələkbərov (1910-1963) Bakıda anadan olub. 

1920-ci ildə - Erməni silahlı qüvvələrinin təcavüzünə qarşı aparılan mübarizəyə rəhbərlik etmək üçün Qarabağda Baş Qərargahın rəisi general-mayor Həbib bəy Səlimovun rəhbərliyi altında başqa bir xüsusi qərargah da yaradıldı və Ağdamda yerləşdi. Martın 26-da general H.Səlimov Ağdama çatan kimi Əsgəran yolunun kəşfiyyatını apardı. Əsgəran ətrafındakı bütün yüksəkliklər erməni silahlılarının əlində idi.

1926-cı ildə - Tarix elmləri doktoru, professor, AMEA-nın müxbir üzvü, Azərbaycan Səfəvişünaslıq məktəbinin banisi Oqtay Əbdülkərim oğlu Əfəndiyev (1926-2013) Bakı şəhərində ziyalı ailəsində anadan olmuşdur.

1989-cu ildə - SSRİ-də ilk alternativ seçkilər keçirilib. SSRİ Xalq Deputatları Qurultayının 2250 deputat (ərazi, milli-ərazi seçki dairələri və ictimai təşkilatlar üzrə 750 nəfər) yeri uğrunda 10 min namizəd mübarizə aparıb. Bu, Azərbaycanda da ilk alternativ əsaslı seçki idi. Buna qədər seçkilər "1 mandat - 1 namizəd" prinsipi ilə keçirilirdi. 

1992-ci ildə - Vüqar Məmməd oğlu Yarməmmədov (1960-1992) Qarabağda gedən döyüşlərdə düşmən snayperinin gülləsinə tuş gələrək şəhidlik zirvəsinə ucalır. 

1993-cü ildə - Kəlbəcər rayonunun Ağdaban kəndi ikinci dəfə düşmən əlinə keçdi və yandırıldı (birinci dəfə 1992-ci il aprelin 8-də tutulmuşdu).

1993-cü ildə - Futbol hakimi, futbolçu, Azərbaycan Futbol Federasiyası Assosisiyasında hakimlərin sədri, daha sonra isə baş katib vəzifələrində çalışmış, dünya futbol tarixində adı stadiona verilən yeganə hakim Tofiq Bəhram oğlu Bəhramov (1925-1993) vəfat edib.  

1998-ci ildə - Prezident Heydər Əliyev "Azərbaycanlıların soyqırımı haqqında" fərman imzalayıb. Fərmanda XIX əsrin əvvəlindən ermənilərin Azərbaycan torpaqlarına köçürülməsi, azərbaycanlılara qarşı həyata keçirilmiş soyqırımı siyasətinə tarixi-siyasi qiymət verilib, 1905-1907, 1918-ci illərdə baş vermiş qətliamlar, 1948-1953-cü illərin deportasiyası, 1988-ci ildə Ermənistanda azərbaycanlılara qarşı etnik təmizləmənin aparılması, bu prosesin Qarabağda və Ermənistanın işğal etdiyi digər ərazilərdə davam etməsi təhlil olunub. Fərmana əsasən, 1918-ci il mart qırğınlarının tarixi - 31 mart Azərbaycanlıların soyqırımı günü elan edilib.

2000-ci ildə - Azərbaycanda 1999-cu il dekabrın 12-də keçirilmiş bələdiyyə seçkilərinin davamı olaraq təkrar seçkilər keçirilib. Həmin seçkilərdə nəticələri ləğv edilmiş 75 bələdiyyə üzrə 500-ə yaxın bələdiyyə üzvü seçilib.

2005-ci ildə - Yeni Azərbaycan Partiyasının III qurultayında prezident İlham Əliyev təşkilatın sədri seçilib. İ.Əliyev 1999-cu ilin dekabrında YAP sədrinin müavini, 2001-ci ilin noyabrında sədrin 1-ci müavini seçilmişdi. Heydər Əliyevin vəfatından sonra partiyaya rəhbərlik edirdi.