“9 MART” TARIXIMIZDƏ
Ana səhifə > Xəbərlər > “9 Mart” tariximizdə
1075    
08/03/2017

1907-ci ildə -  Azərbaycanda  tətil  mübarizəsinin kulminasiya nöqtəsi Xəzər ticarət donanması dənizçilərinin martın 9-dan aprelin 25-dək davam edən tətili oldu. Çıxışa sosial-demokratların və əsasən eserlərin təmsil olunduqları tətil komitəsi rəhbərlik edirdi. Hümmətçi M.Hacıqasımov onun tərkibinə daxil idi. "Hümmət" tətil edən azərbaycanlı fəhlələr içərisində böyük təşviqat işi aparırdı. Tətil komitəsi bütün Xəzər ticarət donanmasının gəmi komandalarının vəziyyətini iqtisadi və hüquqi-siyasi aspektlərdən əks etdirən 48 bənddən ibarət tələblərini işləyib hazırladı. Xəzərin digər limanlarında dayanan gəmilərin komandaları da ona qoşulduğu üçün tətil ümumi xarakter daşıyırdı və Ümumrusiya əhəmiyyəti kəsb edərək, ölkənin iqtisadi həyatına güclü təsir göstərdi. General-mayor baron fon Taube başda olmaqla Bakıya, Petrovska, Krasnovodska, Həştərxana cəza ekspedisiyaları göndərildi, kütləvi repressiyalar başlandı.

1915-ci ildə - Xalq rəssamı Kamil Əli Abbas oğlu Xanlarov Bakıda (1915-1996) anadan olub. 

1917-ci ildə - Rusiya imperiyasının Müvəqqəti Hökuməti Qafqazda çar idarəçilik sisteminin - canişinliyin ləğv edilməsi barədə qərar verib. Bunun əvəzində Cənubi Qafqazdan Rusiya Dövlət Dumasına seçilmiş deputatlardan ibarət yeni qurum - Zaqafqaziya Xüsusi Komitəsi yaradılıb. Çar II Nikolayın taxt-tacdan əl çəkməsindən (Fevral inqilabı) sonra iqtidara gələn Müvəqqəti Hökumət imperiyanın əyalətlərində nisbətən demokratik üsul-idarə tətbiq etməklə mərkəzdənqaçma meyllərini önləməyə çalışırdı.

1930-cu ildə - Ədəbiyyatşünas, tənqidçi, filologiya elmləri doktoru, professor Abdulla Əsgər oğlu Abbasov (Abdulla Abbas) Quba şəhərində anadan olmuşdur.

1992-ci ildə - Argentina Azərbaycanın dövlət müstəqilliyini tanımaq barədə bəyanat verib. İki ölkə arasında diplomatik münasibətlər 1993-cü il noyabrın 8-də qurulub.

2003-cü ildə - Bakıda yeni yəhudi sinaqoqu açılmışdır. Bu, Avropada ən böyük sinaqoqdur. 

2007-ci ildə - Bakıda Azərbaycan və Türkiyə diaspor təşkilatları rəhbərlərinin I forumu keçirilib. Prezident İlham Əliyevin təşəbbüsü ilə keçirilən forumda Türkiyənin baş naziri Rəcəb Tayyib Ərdoğan, Şimali Kipr Türk Cümhuriyyətinin prezidenti Mehmet Əli Tələt, türkdilli ölkələrin rəsmiləri - ümumilikdə 48 ölkədən 500-dən çox nümayəndə və qonaq iştirak edib. Forumda xaricdəki azərbaycanlı və türk diaspor təşkilatlarının əməkdaşlığının gücləndirilməsi, Azərbaycan və Türkiyənin beynəlxalq arenadakı maraqlarının birgə müdafiəsi, tarixi həqiqətlərin dünya birliyinə çatdırılması yönündə müştərək addımlara dair qərarlar qəbul olunub.  

2014-cü ildə - Tarix üzrə elmlər doktoru, Bakı Dövlət Universitetinin slavyan ölkələri tarixi kafedrasının professoru Eldar Rafiq oğlu İsmayılov (1950-2014) martın 9-dan 10-na keçən gecə ürək tutmasından dünyasını dəyişib.