1158    

07/03/2017

1338-ci ildə - Azərbaycan filosofu, şair, Orta Əsrlər müsəlman Şərqinin görkəmli mütəfəkkiri Əvhədi Marağalı vəfat edib. Sufilik fəlsəfəsinə əsaslanan poetik əsərlərin, şeir və poemaların (ən məşhuru "Cəmşid piyaləsi") müəllifidir. Dəqiq təvəllüdü məlum deyil, 1274-cü ildə Marağada doğulduğu təxmin edilir.

1722-ci ildə - Əfqanlar Gülnabad döyüşündə qızılbaşları məğlubiyyətə uğradaraq Səfəvilər dövlətinin mərkəzi olan İsfahanı mühasirəyə aldılar.  İsfahanın mühasirəsi mart ayının ortalarından oktyabra qədər davam etdi. Daha dəqiq desək mart ayının 11-dən başalayan mühasirə 25 oktyabrda Səfəvi şahı Şah Sultan Hüseynin İsfahanı Mir Mahmud gilzaya təslim etməsi ilə başa çatdı. İsfahan mühasirəsi vaxtı 20.000 nəfər döyüş meydanlarında, 100.000-lə insan şəhərin küçələrində aclıqdan həlak oldu. Əhalinin də şəhəri kütləvi şəkildə tərk etməsi nəticəsində bir vaxtlar nisf-i cahan, yəni dünyanın yarısı adlanan bu şəhərdə 600.000 nəfər əhali yaşayırdısa, işğalın yekununda heç 100.000 nəfər əhali qalmamışdı.     

1911-ci ildə - Xalq artisti Ağadadaş Gülməmməd oğlu Qurbanov (1911-1965) Bakıda anadan olub. 1927-ci ildən Dövlət Gənc Tamaşaçılar Teatrında, 1952-ci ildən Dövlət Dram Teatrında çıxış edib.

1919-cu ildə - Azərbaycanla Gürcüstan arasında dəmir yolu rabitəsi haqqında saziş bağlandı. 

1923-cü ildə - 20 yanvar şəhidi Bafadar Ağamirzə oğlu Səfərov (1923-1990) Bakı şəhərində anadan olub. 

1931-ci ildə - Azərbaycan Cümhuriyyətində həm XİN-i, həm də DİN-i vəzifələrini icra etmiş Məmmədhəsən Cəfərqulu oğlu Hacınski (1875-1931) Tiflis həbsxanasında həlak olmuşdur. 

1934-cü ildə - Azərbaycan Respublikasının Əməkdar artisti, xalq artisti, tarzən Ceyran Əsəd qızı Haşımova Bakı şəhərində musiqiçi ailəsində anadan olmuşdur. 

1936-cı ildə - Tanınmış müğənni, "Kor ərəbin mahnısı"nın ilk ifaçısı Məmmədəli Əliqulu oğlu Əliyev (ədəbi təxəllüsü Sail) (1936-1983) Bakı şəhərində anadan olub. 

1940-cı ildə - Azərbaycan Beynəlxalq İnqilabçılara Kömək Təşkilatı "Kapitalın dustaqlarına köməyi gücləndirmək haqqında" xüsusi qərar qəbul etdi. Bu, respublika zəhmətkeşləri tərəfindən müdafiə olundu. Qərar barədə məlumat almış Xanlar (indiki Göygöl), Xaçmaz, Vartaşen (indiki Oğuz), Göyçay və başqa rayonların zəhmətkeşləri bildirdilər ki, onlar yeni qüvvə ilə xarici siyasi dustaqlara kömək edəcəklər. 

1955-ci ildə - Sumqayıt alüminium zavodu fəaliyyətə başladı. 

1959-cu ildə - Publisist, tərcüməçi, dramaturq, ictimai xadim Mirzə Bala Məmmədzadə (1898-1959) İstanbulda qəflətən ürək xəstəliyindən vəfat etmiş, Qaraca Əhməd məzarlığında dəfn olunmuşdur.

1991-ci ildə - Xocavənd rayonunun Qaradağlı kəndin yaxınlığında ermənilər tərəfindən 2 nəfər vəhşicəsinə qətlə yetirildi. 

1996-cı ildə - Prezident Heydər Əliyev Gürcüstana ilk rəsmi səfərə gedib. Səfər gedişində iki ölkə arasında tərəfdaşlıq və qarşılıqlı təhlükəsizlik yardımı haqqında saziş və digər müqavilələr imzalanıb.