1099    

23/02/2017

1909-cu ildə - Azərbaycan ədəbiyyatı tarixinin görkəmli tədqi-qatçısı, akademik Həmid Hacı Məmmədtağı oğlu Araslı (1909-1983) Gəncə şəhərində anadan olmuşdur.

1911-ci ildə - Xalq artisti, rejissor Şəmsi Bədəl bəy oğlu Bədəlbəyli (1911-1986) Şuşada anadan olub.

1918-ci ildə - Üç əsas partiya fraksiyalarının nümayəndələrindən ibarət olan Zaqafqaziya Seymi öz işinə başladı. Seymdə Gürcüstandan sosial-demokratlar (menşeviklər) 32 nəfər, Azərbaycandan müsavatçılar, onlara qoşulmuş bitərəf demokratlar - 30 nəfər, ermənilərdən Daşnaksütyun partiyasından olanlar 27 nəfər deputat iştirak edirdi 89. Bundan əlavə, sosial-inqilabçılar (eserlər), milli demokratlar, Erməni Xalq Azadlıq Partiyası, Müsəlman Sosialist Bloku 7 nəfər, Rusiyada müsəlmanlar fraksiyası ("İttihad") 3 nəfər və menşevik-hümmətçilər partiyası 4 nəfər deputatla Seymdə təmsil olunmuşdular. 

1920-ci ildə - Azərbaycan Cümhuriyyəti höküməti Daxili İşlər Nazirliyini gücləndirmək üçün bu vəzifəyə hökumətin ən gənc üzvü olan Mustafa bəy Vəkilovu, onun müavini vəzifəsinə isə partiyanın radikal mövqeli liderlərindən olan Şəfi bəy Rüstəmbəyovu məsləhət gördü. Məhz onların səyi ilə dövlətə zidd ünsürlərə qarşı fəal mübarizə başlandı, bolşeviklər içərisində həbslər keçirildi, fəhlə klubları və ən irticaçı, ciddi müxalifət mövqeyində olan qəzetlər "Yedinaya Rossiya", "Novıy mir" və s. bağlandı. 

1938-ci ildə - Tarixçi, etnoqraf, tarix elmləri doktoru, professor Qəmərşah Cavadov (1938-2005) Quba rayonunun Aydınkənd kəndində anadan olmuşdur.

1954-cü ildə - Görkəmli həkim, şair, publisist, Azərbaycan Yazıçılar Birliyinin üzvü Əfrahim İsmayıl oğlu Hüseynov Cəlilabad rayonunun Alar kəndində anadan olmuşdur. 

1957-ci ildə - Azərbaycanın Milli Qəhrəmanı, Qarabağ müharibəsi şəhidi Ərəstun İspəndi oğlu Mahmudov (1957-1992) İsmayıllı rayonunun Pirəbilqasım kəndində anadan olmuşdur. 

1958-ci ildə - Qarabağ müharibəsi şəhidi Cəlil Zakir oğlu Qasımov (1958-1992) Ağdamın Quzanlı kəndində anadan olub. 

1990-cı ildə - Ermənistan SSR-in Mərkəzi Seçki Komissiyası respublika Ali Sovetinə seçkilərlə bağlı Dağlıq Qarabağda seçki dairələrinin yaradılması barədə qərar qəbul edib. SSRİ-nin bir müttəfiq respublikasının digərinin suverenliyinə bu cür kobud müdaxiləsi Moskva tərəfindən gözardı edildi. Bundan ruhlanan ermənilər həmin ilin sentyabrında Dağlıq Qarabağda Azərbaycan parlamentinə seçkilərin keçirilməsinə imkan vermədilər.

1993-cü ildə - Azərbaycan Respublikasının Milli Məclisi tərəfindən üçrəngli dairəvi qalxan üzərində, içində alov olan səkkizguşəli ulduz təsvirli Dövlət Gerbi təsdiq etdi.

2001-ci ildə - Milli Məclisdə ölkə rəhbərliyinin, siyasi qüvvələrin, politoloqların iştirakı ilə Dağlıq Qarabağ münaqişəsinə dair açıq müzakirələr başlanıb. İki gün sürən müzakirələrin yekunu olaraq Qarabağ münaqişəsinin Azərbaycanın ərazi bütövlüyündən kənarda həll yolunun olmadığı bir daha vurğulanıb. Müxalifət tərəfindən ölkə rəhbərliyinin apardığı danışıqlar kursuna alternativ olaraq heç nə təklif edilməyib.

2003-cü ildə – Görkəmli aktyor, Xalq artisti Həsənağa Səttar oğlu Turabov (1938 - 2003) vəfat edib.