KARTLININ HƏYATI KİTABI HAQQINDA

VIII əsrdən yazılmağa başlamış və zamanla XIX əsrə qədər əlavələr edilmiş gürcü əlyazmaları toplusudur. İki hissəyə ayrılır: Qədim və Yeni Tsxovreba. “Qədim” hissəsi Kartlinin XIV əsrə qədərki, "Yeni" hissəsi isə XIV əsrdən XVIII əsrə qədərki tarixini əhatə edir. Birincinin XV-XVII əsrlərə aid bir neçə siyahısı qalmışdı. XVIII əsrdə çar VI Vaxtanq tərəfindən yaradılmış komissiya (Beri Eqnataşvili rəhbərliyi ilə) Gürcüstanın XIV-XVIII əsrlər tarixini tərtib etdi. XIX əsrdə "Kartlis tsxovreba"ya XVII-XVIII əsrlərə aid bir sıra tarixi mövzularda məqalələr də əlavə edildi. Topluda Leonti Mrovelinin “Kartli çarlarının həyatı”, “Arçilin şəhidliyi”, Cuanşer Cuanşerianinin “Vaxtanq Qorqasalın həyatı”, anonim müəlliflərin “Kartli Salnaməsi”, “Çarlar çarı Davidin həyatı”, “Laşa Georgi dövrünün Salnaməsi”, “Yüzillik Salnamə” əsərləri, Sumbat Davitisdzenin “Baqrationilər tarixi və hekayətləri”, Basiliy Ezosmodzqvarinin “Çariça Tamarın tarixi”, Çariça Tamarın birinci tarixçisinin ”Hökmdarların tarixi və mədhi” əsərləri öz əksini tapmışdır.